Trader kumasa sa holdap: Suspek utas, 2 sugatan
MANILA, Philippines — Isang hinihinalang holdaper ang patay habang sugatan ang kanyang dalawang kasamahan nang kumasa at pagbabarilin ng isang negosyante na kanilang pinasok at pagnakawan sa Brgy. Teacher’s Village West, Quezon City kamakalawa ng gabi.
Dead-on-the-spot ang suspek na si Herminigildo Garcia, 36, ng 2 Himlayan Road, Brgy. Tandang Sora, Quezon City habang sugatan ang kanyang mga kasamahan na sina Dino Carlo Buenavesta, 38, ng 22 Cebu St., ng Brgy. Culiat, QC, na naka-confine sa QC General Hospital; at Floro Cabalhao, 48, security guard, residente ng Talanay Arta, Brgy. Batasan Hills, QC, na nakaratay naman sa East Avenue Medical Center dahil sa mga tama ng bala sa iba’t ibang bahagi ng katawan.
Sa ulat ng Criminal Investigation and Detection Unit (CIDU) ng Quezon City Police District (QCPD), dakong alas-7:45 ng gabi habang nagbabantay si Oliver Chiong, 36, ng kanyang tindahan ng softdrinks at alak na matatagpuan sa 82 Matahimik St., Brgy. Teacher’s Village West kasama ang kanyang mga tauhan nang dumating ang mga suspek na armado ng mga baril. Dalawa sa kanila ang nagpanggap na kostumer habang ang isa ay nagsilbing lookout.
Pagkapasok sa loob ng tindahan, agad na nagdeklara ng holdap ang mga suspek at tinangay ang P560,000 na kita ng tindahan, apat na iba’t ibang uri ng cellphone at isang Ipod at saka mabilis na lumabas.
Hindi naman nag-aksaya ng panahon si Chiong at kaagad na kinuha ang kanyang baril. Sinundan niya ang mga tumatakas na suspek at ng kanyang abutan habang papasakay pa lamang sa motorsiklo ay saka niya pinagbabaril.
Napuruhan ni Chiong si Garcia habang tinamaan din sina Buenavesta at Cabalhao ngunit nagawa pa ring nilang makatakas.
Inireport ni Chiong sa QCPD Station 9 ang insidente at kinalaunan ay nakatanggap ng tawag ang pulisya mula sa naturang mga pagamutan na may dalawang sugatang lalaki na isinugod doon kaya’t kaagad nilang nirespondehan.
Positibo na kinilala ni Chiong at ng kanyang mga tauhan ang dalawang sugatang suspek na siyang mga nangholdap sa kanila.
Nabawi rin mula sa mga suspek ang mga pera at cellphone na kanilang natangay mula sa biktima matapos na aminin ng asawa ni Cabalhao na iniwanan ito ng kanyang mister sa kanilang tahanan.
- Latest