MPD kay Solano: Hindi ka doktor!
MANILA, Philippines — Nanindigan si Manila Police District Director, Chief Supt. Joel Coronel na namatay ang UST Law student na si Horacio ‘ Atio’ Castillo III dahil sa hazing.
Ito ang naging sagot ni Coronel sa inilabas na pahayag ng isa sa mga suspect na si John Paul Solano na isinisisi sa umano’y paglaki ng puso ang pagkamatay ni Castillo
Buwelta ni Coronel, di hamak na may kredibilidad ang mga doktor ng MPD na nagsagawa ng medico legal kay Castillo kesa kay Solano na isang med tech professional.
Dagdag pa ni Coronel, ang pahayag ni Solano ay pawang espekulasyon lamang nito dahil kung totoo aniya ang sinasabi nito ay noong dinala niya sa ospital si Castillo ay sinabi niya agad na ito ay inatake sa puso.
Sinabi ni Coronel na hindi nila papayagan na baluktutin ni Solano ang kanilang findings na pinatutunayan ng mga ebidensiya.
Kasabay nito, binuweltahan na rin ng ilang Senador si Solano sa naging pahayag nito.
Ayon kay Senator Juan Miguel Zubiri, hindi na lamang ang Senado ang ginagago ni Solano kung hindi ang buong bansa. Idinagdag ni Zubiri na kahit pa anong pre-condition mayroon si Castillo na itinanggi na ng kanyang mga magulang, maliwanag na naghahanap ng excuse ang kampo ni Solano para malusutan ang krimen.
Sinabi naman ni Senator Sherwin Gatchalian na ginagawa lahat ni Solano ang paraan para patagalin ang pagbibigay ng hustisya kay Castillo. Naniniwala rin si Gatchalian na kontrolado ng Aegis Juris si Solano.
Sinabi naman ni Senator Francis ‘Chiz’ Escudero na kung walang nangyayaring panggugulpi o hazing ay tiyak na hindi mangyayari ang sinasabing cardiac arrest.
- Latest