Pamilya ni Kian isailalim sa WPP-VACC
MANILA, Philippines - Matapos ang mga kuwestiyon at pagkondena, nadagdagan pa ang mga grupong nagpahayag ng suporta at tulong sa pamilya ng pinaslang na si Kian Lloyd Delos Santos sa anti-illegal drugs operation sa lungsod ng Caloocan noong nakalipas na linggo.
Ayon sa Volunteers Against Crime and Corruption, handa umano silang magkaloob ng tulong-legal sa pamilya ni Kian para matiyak na mabibigyan ng katarungan ang pagkamatay ng binatilyo.
Ayon kay VACC Spokesperson Arsenio Evangelista, imumungkahi rin nila kay Justice Secretary Vitaliano Aguirre na isailalim ang pamilya ni Kian pati na ang mga gustong tumestigo sa pagpatay kay Kian sa Witness Protection Program.
Sa kabila nito, tiniyak ni Evangelista na suportado pa rin nila ang kampanya ng administrasyon laban sa iligal na droga, pero hindi umano ito dapat nauuwi sa pag-abuso ng mga pulis.
- Latest
