Clearing operation sa Maynila, tuluy-tuloy
MANILA, Philippines - Humingi ng pang-unawa sa publiko partikular na sa mga Manilenyo ang mga opisyal ng lokal na lungsod ng Maynila hinggil sa abalang idinudulot ng kanilang patuloy na pagsasagawa ng clearing operation upang mapaluwag ang daloy ng trapiko sa lansangan.
Ayon kay MTPB Chief Dennis Alcoreza, patuloy umano silang nagsasagawa ng clearing operation dahil layunin umano nilang mapaluwag ang lansangan sa buong Maynila batay na rin sa mahigpit na kampanya ni Mayor Joseph Estrada laban sa mga illegally parked vehicles at lahat ng obstructions sa kalye na nagdudulot ng matinding pagsisikip ng mga lansangan.
Iginiit din ni Alcoreza na ang mga kagawad ng MTPB ay dumaan sa mga pagsusulit at seminar upang maging angkop umano sila sa kanilang pananagutan bilang tagapangalaga sa mga lansangan sa lungsod ng Maynila.
Nagbabala din ang opisyal sa lahat ng tauhan ng MTPB na hindi umano ito magdadalawang isip na tanggalin sa serbisyo at sampahan ng kaukulang kaso ang mga ito sa oras na madawit sa katiwalian at iligal na gawain.
Matatandaan na nagpahayag si Estrada na ipatutupad nito ang ‘one strike policy’ sa mga traffic enforcers na masasangkot sa pangingikil o anumang iligal na gawain matapos nitong isailalim sa reorganisasyon ang MTPB noong nakaraang taon.
- Latest