Rali sa SONA, naging payapa-PNP
MANILA, Philippines - Payapa ang isinagawang mga kilos protesta ng mga militanteng grupo na sumabay sa ikalawang State of the Nation Address (SONA) ni Pangulong Rodrigo Duterte sa Batasan Pambansa sa Quezon City kahapon.
Sa pagtaya ng pulisya, naging maayos at walang naiulat na mga kaguluhan sa magkabilang panig.
Magkasabay na nagsagawa ng rali ang mga anti at mga taga-suporta ni Pa-ngulong Rodrigo Duterte sa may Batasan Complex sa Quezon City.
Ayon sa mga anti-Digong, bigo umano ang Pangulo na tupdin ang pangakong socio economic reforms sa hanay ng mga manggagawa sa bansa.
Sa kabilang banda naman ng protesters malapit sa Batasan Complex ay nandon ang pro-Digong na patuloy namang nagpahayag ng kanilang suporta kay Pangulong Duterte.
Ayon sa Duterte Youth, nailapit ni Digong sa pamahalaan ang maliliit na mamamayan at naipakita sa taumbayan na protektahan ang kanilang kapakanan sa pamamagitan ng pagsugpo sa iba’t ibang uri ng krimen, korapsyon at kampanya kontra droga.
Samantala, umaabot sa 1,000 pares ng mga tsinelas at sapatos ang ikinalat ng mga anti-government protesters sa kahabaan ng Commonwealth Avenue, Quezon City bilang protesta umano sa mga biktima ng extra judicial killings sa giyera kontra droga ng pamahalaan at sa pagpapalawig ng martial law sa Mindanao.
Ang kilos protesta ay inilunsad ng mga anti-Duterte.
Sinabi pa ng lider ng grupo na maaring hindi na sila makapag-martsa sa mga susunod na SONA kung mapapalawig ang martial law sa buong bansa kaya’t dapat na mapigilan ang diktaturya hanggang maaga.
Sa inisyal na pagtaya ng National Capital Region Police Office (NCRPO), nasa 7,000 anti-Duterte protes-ters sa bahagi ng IBP sa Kalinisan Road habang nasa 3,000 naman ang mga pro-Duterte sa bahagi ng Quezon City Memorial Circle, Brgy. Central, Quezon City; 500 pro-Duterte sa IBP at nasa 1, 400 naman sa may bahagi ng Civil Service sa Batasan Complex.Nasa 6, 300 ang idineploy na mga pulis ng NCRPO, 300 sundalo sa loob ng Batasan na kabilang sa nasa 1,000 sun-dalong idineploy at standby forces para matiyak ang mapayapang SONA sa taong ito.
- Latest