Brgy. chairman, dinedo sa Caloocan
Sa ulat ng pulisya, naglalakad sa may 9th Avenue dakong alas-5:40 ng hapon pauwi ng kanyang bahay si Guevarra buhat sa kanyang trabaho bilang lineman ng PLDT sa Tayuman, Maynila nang lapitan ng gunman at barilin sa likod ng ulo nang malapitan. File
MANILA, Philippines - Isa na namang barangay chairman sa lungsod ng Caloocan ang pinagbabaril at napatay ng riding-in-tandem, kamakalawa ng hapon.
Hindi na umabot nang buhay sa Manila Central University Hospital ang biktimang si Francisco Guevarra, 53, chairman ng Brgy. 106 Gracepark at naninirahan sa 8th Avenue sa naturang barangay.
Blangko pa ang pulisya sa pagkakakilanlan sa mga salarin na sakay ng isang motorsiklo.
Inilarawan ng mga saksi ang nagmamaneho ng motor na nakasuot ng helmet, pulang t-shirt at short maong pants, habang ang gunman at backride ay nakasuot ng sombrero, berdeng t-shirt at maong na pantalon.
Sa ulat ng pulisya, naglalakad sa may 9th Avenue dakong alas-5:40 ng hapon pauwi ng kanyang bahay si Guevarra buhat sa kanyang trabaho bilang lineman ng PLDT sa Tayuman, Maynila nang lapitan ng gunman at barilin sa likod ng ulo nang malapitan.
Nang bumagsak si Guevarra, dalawang beses pa siyang binaril ng gunman saka tumakas sakay ng motorsiklo.
Sinabi sa mga imbestigador ni Ronald Guevarra, kapatid ng biktima, na dating naisama sa police drug watchlist ang kanyang kapatid ngunit nabura rin makaraang malinis niya ang kanyang pangalan sa koneksyon sa iligal na droga.
Patuloy ang masusing imbestigasyon ng pulisya sa insidente upang matukoy ang motibo sa pamamaslang na maaari ring may kaugnayan sa kanyang posisyon. Naghahanap din ang mga pulis ng kopya ng video footage ng mga “closed circuit television camera” sa bisinidad sa pag-asang nahagip ang mga salarin at makilala sila.
Matatandaan na noong Mayo 26, pinaslang naman sa harap ng barangay hall si Brgy. 68 Chairman Jerrboy Mauricio ng mga hinihinalang bayarang hitman na lulan din ng motorsiklo. Hindi pa rin nareresolba ang kaso ng pulisya.
- Latest
