Sugbo angay mangandam

CEBU, Philippines - Angay nga mangandam usab ang Cebu sa gitawag og “The Big One” o ang labing kusog nga linog nga posibleng mahitabo sa nasud, sumala pa ni Renato Solidum, ang officer-in-charge sa Phivolcs.

Si Solidom namahayag niini atol sa Nationwide Simultaneous Earthquake Drill nga gipahigayon sa Central Command.

Gitug-an usab niya nga adunay lima ka major fault lines ang Cebu nga makita sa Northern Cebu, Southern Cebu ug Central Cebu.

"Cebu too should prepare for the Big One because Cebu has many fault lines and an intensity 8 earthquake may happen in Cebu," matud pa ni Solidom.

Dungag pa ni Solidum nga dili lang ang Manila nga naa sa peligro kondili ang tanang lugar nga adunay mga fault lines angayan nga mangandam sa maong panghitabo.

Si Solidum midugang nga posibleng adunay mahitabong tsunami kung dunay marine landslide o ang kilid sa dagat mag-landslide panahon sa kusog nga linog o ang linog diha gyud magagikan sa dagat.

Laing posibilidad nga adunay tsunami kung ang linog anaa lang sa ibabaw ug ang fault o pagkasiak sa yuta paingon sa taas. Gihimo niyang sanglitanan ang linog niadtong tuig 2012  didto sa Negros Oriental ug ang Western Cebu diin adunay nasinati nga tsunami tungod sa submarine landslide sa habig sa Negros Oriental.

Tungod niini, iyang giawhag ang mga local government units nga hugot gyud sundon ang lagda sa Building Code of the Philippines nga gituyo aron makasugakod sa kusog kaayong linog aron dili mahugno ang mga tukorong buildings.

Natagbaw hinuon si Solidom sa gipahigayon nga earthquake drill kagahapon gawas lamang sa ginagmay nga kinahanglang korihian sama sa earthquake drill diha sa Capitol Grounds.

Kini human nakita ni Solidom nga ang mga kawani sa Kapitolyo human nigawas sa building nidiretso sa silong sa punoan sa mga kahoy nga matud pa niya peligro kun kusog kaayo ang linog kay mangatumba ug mangabali ang sanga niini.

Hinuon gidayeg niya ang mga kawani kay bisan og nag-uwan seryoso sila sa ilang pagsalmot, apil na ang mga team leaders sa mga responders ug uban pa. Mitchelle L. Palaubsanon ug Brenda D. Batuto (BANAT NEWS)