Brgy. Jaclupan, talisay city
“Gihimo na man intawon nga parkingan sa mga sakyanan ang karsada niining maong barangay. Kuyaw kaayo sa disgrasya sa mga moagi nga sakyanan, labi na ang gikan sa Campo 2 ug Campo 3.
Brgy Calamba, Cebu City
“Nganong ang mga polis wala man gyud makaronda diha sa Quijano compound nga daghan man kaayo diha ang mamaligya og shabu. Unsa man gyu’y rason ngano nga lisud man gyud sudlon kanang lugara?”
Brgy Lugo, Borbon, Cebu
“Ngano man intawon kining karsada sa Eme, padulong diri sa among barangay nga gikabkaban ra man ang kilid unya wala man tiwasa dayon og trabaho. Ang mas maayo unta nilang gibuhat gianam-anam pagkabkab para way mahasol nga mga motorista.”
Brgy Sabang, Danao City
“Human madakpi ang usa ka tigbaligya og shabu diri, may mipuli na pud nga namaligya ug anaa ra atbang sa balay sa kanhi city councilor diri sa among siyudad. Maayo unta og aksyonan dayon ni sa mga polis.”
Brgy Kasambagan, Cebu City
“Sa Sitio Paray, naa man diri ang tanang ilegal dia diri ang daghang namaligya’g shabu ug hasta sa illegal gambling, unya mga batan-on pa gyud kasagaran ang nalambigit sa mga ilegal nga kalihukan diri.”
Brgy Tubod, Minglanilla, Cebu
“Ingon si Presidente Duterte nga wala nay pagpangabkab sa kabukiran kay ilegal, pero nganong diri sa among bukid may nagsige man gihapon og pangabkab. Mao ni hinungdan nga guba kaayo ang karsada diri dapit tungod sa dagkong truck nga gikargahan sa mga kinubkob nga anapog.”
Brgy Guadalupe, Cebu City
“Kining problema sa tubig diri sa Sitio Awihaw wala man gyud mahatagi og aksyon, daghan na kaayong mga molupyo diri nga apektado na ang trabaho ug pag-eskuwela. Wala man gyud nila ayuha ang tinubdan sa tubig.”
Brgy Ilaya, San Fernando, Cebu
“Ngano man intawon kining among lugar nga nagkadaghan na man hinuon ang shabu imbes nga masulbad tungod sa programa sa kapolisan batok sa ilegal nga drugas? Bisa’g kinsa na lang nga mga tawo ang mosulod diri ug wala’y nakabadlong.”
Brgy Pasil, Cebu City
“Saba kaayo ang mga pusher diri dapit sa kapilya sa Sitio Lawis, labi na panahon sa kaadlawon. Dili intawon makatulog og tarong ang mga nagpuyo niining duol sa hideout sa mga pusher o mga parok.”
Brgy Marigondon, Lapu-Lapu City
“Palihug intawon ko pagpahibawo sa mga opisyal diri sa among barangay bahin sa Tonggo Beach kay gihimo na man hinuong labayanan og basura, wala may nakabadlong nga mga taga barangay.”
Alang sa mga reklamo text lang sa 09083006702
- Latest
