Erap sa city hall employees: ‘Change is coming’
MANILA, Philippines – ‘Change is coming’. Ito ang bahagi ng talumpati ni Manila Mayor Joseph Estrada sa paggawad ng parangal sa mga “Outstanding Employees” noong Miyerkules, na bahagi ng ika-445 taong selebrasyon ng Araw ng Maynila.
Babala ni Estrada, kailangan na humanda ang mga kawani ng city hall sa pagsisimula ng kanyang ikalawang termino bilang alkalde ng lungsod sa Hulyo 1.
Ayon kay Estrada, magkakaroon ng pagbabago sa hanay ng mga empleyado ng lungsod sa susunod na tatlong taon.
“Kung may pagbabagong dala ang bagong panguluhan sa Malacañang, dito rin sa Maynila, change is coming,” ani Estrada.
Dito ay muling binanggit ng alkalde ang umano’y pananabotahe ng ilang opisyal at kawani ng city hall sa kanyang mga programa at proyekto mula nang siya ay umupo noong 2013.
Kabilang na rito ang ilan na sadyang pinatatagal ang pagproseso ng mga papeles nang walang dahilan, mayroon ding iligal na naniningil ng kung anu-ano sa mga residente na nais makakuha ng libreng serbisyo-medikal, at ilan pang nagpapakalat ng mga paninira upang masira ang tiwala ng tao sa kanya.
Aniya, hindi na dapat magpatuloy ang paninira sa kanyang mga programa dahil ang Manilenyo ang mas naaapektuhan.
Giit pa ni Estrada, wala siyang tinanggal o nilipat na empleyado mula noong 2013 na pagpapatunay na hindi umano siya benggador.”
Ipinagmalaki nitong nabayaran niya ang P5.5-bilyong utang ng lungsod na iniwan ng pinalitan niyang mayor, at naibigay ang mga benepisyo at salary increase na matagal na ipinagkait sa mga empleyado.
Sa kauna-unahang pagkakataon ay nakatanggap din ang mga kawani ng city hall ng cash incentive na katumbas ng isang buwan nilang suweldo nitong Disyembre.
“Nakakalungkot lang na sa kabila ng lahat ng pang-unawa at serbisyo mayroon pa ring mga ilan na patuloy na kumikilos upang sirain ang ating magandang nasimulan,” ani Estrada.
- Latest