Tandem na holdaper, todas sa engkuwentro
MANILA, Philippines - Patay ang riding-in-tandem na holdaper nang makipagbarilan sila sa mga pulis matapos biktimahin ang isang 18-anyos na dalaga, kahapon ng madaling araw sa Las Piñas City.
Dead on the spot ang mga suspect na nagtamo ng mga tama ng bala sa ibat-ibang bahagi ng katawan buhat sa hindi pa batid na kalibre ng baril habang inaalam pa ng pulisya ang pagkakakilanlan sa mga ito.
Kinilala naman ay kanilang naging biktima na si Mary Jane Delos Reyes, ng Brgy. Moonwalk, Parañaque City.
Ayon kay Senior Supt. Jemar D. Modequillo, hepe ng Las Piñas City Police, naganap ang insidente ala-1:30 kahapon ng madaling araw sa kahabaan ng Tionquiao St., Brgy. Manuyo 2 ng naturang lungsod.
Nag-aabang umano ng masasakyan ang biktima patungong Evacom, nang sumulpot ang dalawang suspect na magkaangkas sa isang motorsiklo ( 2004-WJ.)
Kaagad tinutukan ng mga ito ng baril ang biktima at saka nagdeklara ng holdap at nang makuha ang mga gamit at pera ng huli ay mabilis na umanong nagsitakas.
Tiyempo namang nagpapatrulya sa naturang lugar ang mga kagawad ng Las Piñas City Police at kaagad na humingi ng tulong ang biktima. Mabilis na nagsagawa ng follow-up operation ang mga pulis at hinabol nila ang mga tumatakas na mga suspect.
Pinaputukan ng mga holdaper ang humahabol sa kanilang mga pulis hanggang sa nagpalitan ng putok ang mga ito na ikinasawi ng dalawang suspect
Narekober ng mga pulis mula sa mga suspect ang 2 kalibre .38 baril, mga bala nito, ang motorsiklong ginamit nila sa panghoholdap at bag na pag-aari ng biktima, na naglalaman ng cash na P1,190 at mga cellphone.
- Latest
