2 magsasaka patay sa aksidente sa motor

MANILA, Philippines — Dalawang magsasaka ang nasawi matapos sumalpok ang kanilang sinasakyang motorsiklo sa isang kotse sa Isabela nitong kamakalawa.

Nakilala ang mga biktima na sina Reynante Daño, 30, at Reymundo Damasco, 52, na kapwa residente ng Barangay Marasat Pequeño.

Naisugod pa sa ospital ang dalawa ngunit hindi na umabot pa nang buhay.

Ayon sa imbestigasyon, tinamaan ng kotseng minamaneho ni Mardie Cabotaje, 29, ang motorsiklo sa kahabaan ng national road sa Barangay Darumuangan Sur sa bayan ng San Mateo bandang alas-10 ng gabi.

Sumuko naman si Cabotaje sa mga awtoridad.