Alitan sa lupa: Misis kinatay
MANILA, Philippines — Pinaniniwalaang alitan sa lupa ang isa sa motibo sa brutal na pamamaslang sa 59-anyos na misis matapos itong pagtatagain sa leeg ng hindi kilalang lalaki sa Sitio Lima, Barangay Baluno sa Zamboanga City, Zamboanga del Sur kamakalawa ng hapon.
Halos lumaylay ang leeg ng biktimang si Cletelde Salcedo nang madiskubre ang bangkay nito sa madamong bahagi ng nabanggit na barangay.
Base sa police report na nakarating sa Camp Crame, dakong alas -6 ng umaga nang magtungo sa kaniyang kaingin ang biktima sa nasabing lugar na dapat sa kanilang bahay manananghalian pero hindi ito nakauwi.
Isang kapitbahay na si Rowena Casimiro ang nakadiskubre sa bangkay ng biktima na duguang nakabulagta sa madamong bahagi ng nasabing lugar.
Patuloy naman ang imbestigasyon ng mga awtoridad sa motibo ng suspek kung saan kabilang sa sinisilip na anggulo ay alitan sa lupa at personal na galit.
- Latest
