Suspek sa saleslady slay, arestado
LUCENA CITY, Quezon , Philippines — Hawak na ng pulisya ang isang lalaki na itinuturing na person of interest sa pamamaslang sa saleslady ng boutique sa Barangay 3 sa Lucena City, Quezon.
Ayon kay P/Supt. Reynaldo Maclang, pansamantalang itinago sa pangalang Magno ang lalaki na unang nadakip sa nasabing barangay noong Lunes dahil sa kasong trespass to dwell.
Sa interogasyon ay kinakitaan ng mga kalmot sa katawan si Magno at may mga bahid ng dugo ang damit nito.
Tumutugma rin ang deskripsyon nito sa tinuran ng witness tungkol sa suspek na nangholdap at pumatay kay Vheanca Anne Punzalan, 19, noong Biyernes ng hapon (November 17) sa Baby Owl Boutique.
Sa panig naman ni P/Senior Supt. Roderick Armamento, kinunan ng specimen si Magno upang isailalim sa pagsusuri at kapag nagpositibo ito ay pormal na kakasuhan sa pagpatay kay Punzalan.
Katarungan naman ang hingi ng pamilya at mga kaibigan ng biktima at idinaan nila ito sa social media at kasabay nito ang panawagan sa pulisya na madaliing resolbahin ang kaso upang hindi na maulit ang kahalintulad na krimen.
- Latest
