P11-M smuggled rice, nasabat
NORTH COTABATO, Philippines — Tinatayang aabot sa P11 milyong halaga ng smuggled rice ang nasabat ng Philippine Navy sa karagatang sakop ng Island Garden City of Samal sa Davao del Norte kamakalawa ng gabi.
Nakumpiska ng mga tauhan ng Philippine Navy ang 5,000 sako ng smuggled rice na tumitimbang ng 250,000 kilo.
Base sa ulat ng Naval Forces Eastern Mindanao, bandang alas-10:50 ng gabi nang namataan ang M/L Sunlight na may lulang kontrabando.
Ayon kay Capt. Jose Ma Ambrosio Espeleta, deputy commander ng Naval Forces-Eastern Mindanao, patungong Maco, Compostella Valley mula sa Zamboanga City ang nasabing bangka nang masabat ng Task Force Seahawk.
Walang naipakitang kaukulang dokumento ang kapitan ng M/L Sunlight na si Ahndun Amil.
Sa salaysay ni Amil, ito na ang pangalawang beses na nag-deliver sila ng bigas sa sinasabing isang nagngangalang alyas Johak Sahid sa bayan ng Maco.
Patuloy naman ang imbestigasyon ng mga awtoridad kung saan nagmula ang bigas na ipinupuslit.
- Latest
