Jeepney bumaliktad: 11 sugatan

TUGUEGARAO CITY, Cagayan, Philippines — Umaabot sa 11-katao na karamihan ay estudyante ang nasugatan makaraang bumaliktad ang pampasaherong jeepney na nakasalpok ng motorsiklo sa kahabaan ng highway sa Sitio Kalipkip, Barangay Banangan sa bayan ng Sablan, Benguet noong Miyerkules. ?Sa police report na ipinalabas ni P/Chief Insp. Carol Lacuata, tagapagsalita ng Cordillera police, natumbok ng jeepney driver na si Melchor Ninalga, 41, ang motorsiklong minamaneho ni Bryan Roque, 22, matapos itong mag-overtake ng isa pang sasakyan sa kabilang linya. Ayon sa ulat, nawalan ng kontrol sa manibela si Ninalga hanggang tumama sa bangketa ng kalsada saka bumaliktad. ?Ginagamot sa Baguio General Hospital and Medical Center ang mga sugatang biktima kabilang si Ninalga at siyam na estudyante na may edad 12 hanggang 16 na papasok sana sa paaralan sa La Union dakong alas-6:30 ng umaga.?