Mister tumalon mula 25-ft footbridge, todas
MANILA, Philippines — Pinanghihinalaang may dinadalang mabigat na problema ang nagtulak sa isang mister upang harapin ang kanyang kamatayan matapos itong tumalon mula sa 25 talampakang taas na foot bridge sa kahabaan ng national highway, Brgy.Nueva, San Pedro City, Laguna kahapon ng umaga.
Sa ulat ni Laguna Provincial Police Office (PPO) Director P/ Sr. Supt. Cecilio Ramos Ison Jr., bandang alas-8:50 ng umaga nang mangyari ang insidente sa nasabing lugar.
Ayon sa pulisya, nakatanggap sila ng tawag sa telepono hinggil sa isang balisang mister na umano’y bigla na lamang tumalon mula sa mataas na footbridge sa nasabing lugar.
Ang nasabing mister na inaalam pa ang pagkakakilanlan ay tinatayang nasa 45-55 anyos ay nakasuot ng kulay asul na sleeveless na t-shirt at short.
Nagulantang na lamang ang mga bystanders nang biglang tumalon ang lalaki mula sa footbridge kung saan unang lumagapak sa sementadong highway ang mukha nito.
Ang nasabing mister ay nagtamo ng malubhang mga sugat sa kaniyang mukha, ulo at hita na idineklarang dead-on-arrival sa Amante Hospital.
Isinasailalim pa ng mga awtoridad sa masusing imbestigasyon ang kasong ito upang matukoy kung sino ang nagpatiwakal na mister.
- Latest