9 NPA rebs patay sa engkwentro
BAYOMBONG, Nueva Vizcaya, Philippines — Siyam na rebeldeng New People’s Army (NPA) ang iniulat na napatay habang isa naman sa panig ng military ang nasugatan makaraang sumiklab ang sagupaan sa pagitan ng NPA rebs at militar sa Barangay Burgos, Caranglan, Nueva Ecija, kahapon ng umaga.
Sa inisyal na ulat, kinilala ang apat na rebelde na sina Ka Gian, Ka Bunso, Ka Asok at si Joel “Ka Razul” Manangan na pinuno ng mga rebelde habang sugatan naman ang sundalong si Cpl. Buenavista.
Narekober ng mga militar ang limang M-16 rifles with M203, dalawang M-653, AK-47, M-14 Armalite rifle at walong backpacks na naglalaman ng mga subersibong dokumento.
Nabatid na nagsasagawa ng combat patrol sa hangganan ng Nueva Ecija at Nueva Vizcaya ang pangkat ng 84th Infantry Battalion ng 7th Infantry Division nang makasagupa ang mga rebelde sa pangunguna ni Ka Razul sa Sitio Barat sa nasabing barangay.
Dakong alas-9:50 ng umaga ng humupa ang bakbakan matapos na mapatay ang siyam na rebelde.
Base sa tala, apat na sundalo ang napatay matapos tambangan ng mga rebelde sa Barangay Dine, bayan ng Kasibu, Nueva Vizcaya noong Biyernes (Sept. 1). Dagdag ulat ni Joy Cantos
- Latest