Akyat-bahay naipit ang ulo, arestado
LEGAZPI CITY, Albay , Philippines - Minalas na masakote ang pinaniniwalaang akyat-bahay suspek makaraang maipit ang ulo nito sa bakal na grills ng bahay na kanyang pinasok habang papatakas noong Lunes ng madaling araw sa Barangay Tugos, Sorsogon City sa Sorsogon.
Kinailangan pang tulungan ng mga residente upang matanggal sa pagkakaipit ng ulo ng suspek na si Jameson Fundales Devera ng Barangay Pangpang.
Base sa police report na nakarating kay Camp Simeon Ola, dakong alas-2 ng madaling araw, pinasok ni Devera ang bahay na pag-aari ni Pio Fernandez.
Subalit habang papatakas ay aksidenteng naisuot ng suspek ang kanyang ulo sa grills ng bahay. Gayunman, hindi na nakaalis sa pagkakaipit ang ulo ng suspek kaya kaagad na naaresto ito.
Hindi naman nabanggit sa police report kung may mga gamit na natangay ang suspek.
- Latest