Obrero natusta sa kuryente

BAYOMBONG, Nueva Vizcaya, Philippines – Patay ang 40-anyos na construction worker makaraang makuryente sa ginagawang gusali sa Barangay Don Mariano Marcos sa bayan ng Bayombong, Nueva Ecija kamakalawa ng umaga. Kinilala ang biktima na si Joel Garcia, pansamantalang nakatira sa Barangay Nagbitin, bayan ng Villaverde, Nueva Vizcaya. Base sa mga nakasaksi, dakong alas-10 ng umaga nang maganap ang insidente makaraang sumabit sa kable ng kuryente ang hawak na mahabang tubo ng biktima sa ikaapat na palapag mula sa basement ng gusali. Umabot sa 20-minuto na nakuryente ang biktima bago mahulog makaraang maputol ang kanyang kamay sa pagkahawak sa tubong may kuryente. Naputol din umano ang paa ng biktima habang ang kanyang katawan ay natusta dahil sa lakas ng boltahe ng kuryente. Pansamantalang ipinahinto ang paggawa sa nabanggit na gusali habang patuloy ang imbestigasyon.