Magkalaguyo tiklo sa P.6-M shabu

TUGUEGARAO CITY, Cagayan , Philippines  – Tinatayang aabot sa P.6 milyon halaga ng shabu ang nasamsam ng mga awtoridad sa magkalaguyo sa isinagawang buy-bust ope­ration sa kanilang tiangge sa Barangay 2 San Andres, bayan ng Bacarra, Ilocos Norte noong Biyernes. Kinilala ni P/Chief Insp. Dexter Corpuz, tagapagsalita ng Ilocos Norte Police ang mga suspek na sina Arnel Reyes, 40, cellphone technician, ng Laoag City; at Norma Michelle Llacuna, 39, na nasabing bayan. Nagkakahalaga ng P611,000 ang nasamsam na droga habang ilang drug paraphernalia rin ang narekober sa pugad ng mga suspek. Base sa record ng pulisya, kapwa nasa drug watchlist ang magkalaguyo.? Ayon kay P/Supt. Edwin Balles, hepe ng Laoag City Police Station, nakapagpiyansa si Reyes sa kaso ng droga makaraang masamsaman ng shabu sa kanyang bahay noong 2012.