P10-M shabu samsam sa bahay ng ex-Marawi mayor ‘Financier’ ng Maute…
MANILA, Philippines - Umaabot sa dalawang kilo ng shabu na nagkakahalaga ng P10 milyon ang nasamsam ng mga awtoridad sa tahanan ng isang dating alkalde na itinuturong supporter ng teroristang grupong Maute-Islamic State of Iraq and Syria (ISIS) sa lungsod ng Marawi kahapon ng umaga.
Sa report ng Joint Task Force (JTF) Marawi, bandang alas-10 ng umaga nang marekober sa clearing operations ang methamphetamine hydrochloride o shabu sa bahay ni dating Marawi City Mayor Omar Solitario Ali.
Si Ali ay isa sa mga itinuturing na high value target at isa sa nagsisilbing financier ng Maute-ISIS terror group.
Sa ‘house to house’ clearing operations ng militar laban sa Maute-ISIS sa Marawi nitong Biyernes, nadiskubre ang dalawang kilo ng shabu sa ikalawang palapag ng bahay ni Ali.
Sa tala, si Ali ay kabilang sa mga pulitikong nasa drug watch list na tinukoy ni Pangulong Rodrigo Duterte. Kabilang din siya sa 310 na naisyuhan ng arrest order ni Defense Secretary Delfin Lorenzana sa ilalim ng idineklarang martial law sa Mindanao.Kasama sa mahigit 200 personalidad ay mga narco-politicians na sabit sa rebelyon sa Marawi City na nag-umpisang sumiklab noong Mayo 23.
Nauna rito, may 11 kilong shabu at milyun-milyong pera ang narekober ng military sa isang lungga ng mga terorista sa Marawi.
- Latest