Drug dealer todas sa P11-M drug bust
MANILA, Philippines - Napaslang ang isang “high value target” na umano’y drug dealer habang dalawa pa niyang ang nasakote at nasugatan sa isinagawang drug bust operation na nagresulta sa pagkakasamsam ng mahigit P11 milyong halaga ng shabu sa Butuan City, Agusan del Norte kamakalawa ng gabi.
Sa ulat ni CARAGA Police director P/Chief Supt. Rolando Felix, alas-9 ng gabi nang magsagawa ng operasyon ang Butuan City Police at Philippine Drug Enforcement Agency laban sa suspek na napatay na si Reynaldo Abordo sa Brgy. Libertad ng lungsod.
Nasakote sa operasyon ang kasamahang drug pusher ni Abordo na si Johnny Calawigan, 32, na siyang nagbenta ng droga sa poseur buyer. Nang makatunog umano ang target ay nakipagpalitan ng putok sa mga operatiba subalit nasakote.
Gayunman sa kabila ng nakaposas, nagtangkang tumakas si Calawigan lulan ng Starex van pero nahabol ng pulisya sa Brgy. San Vicente, Butuan City sanhi ng kanyang pagkasugat sa palitan ng putok.
Ang suspek pang si Reneboy Guno ay nasugatan sa bakbakan subalit nasakote rin.
Nakumpiska sa loob ng Ford Escape ng mga suspek ang mahigit dalawang kilo ng shabu na may market value na mahigit P11 milyon, apat na cal. 45 pistol at mga drug paraphernalia.
- Latest
