Sex tourism nabisto

CEBU, Philippines - Gisikop sa National Bureau of Investigation (NBI)-7 ang pito ka Koreano sulod sa giabangan nila nga kwarto sa usa ka hotel sa Brgy  Marigondon, Dakbayan sa Lapu-Lapu kagahapon sa kaadlawon tungod sa kaso sa human trafficking.

Ang operasyon nga gihimo sa NBI-7 pinaagi sa pakig-alayon sa Provincial Women Commission (PWC) ubos sa buhatan ni Vice Governor Agnes Magpale aron sa pag-rescue sa pito ka mga babaye nga giingong biktima sa human trafficking.

Ang mga nasikop mao sila si Jongnam Ham, Munsu Lee, Joontae Kim, Dongkil Kim, Jong In Han, Hosik Park ug Jae Gyu Kim.

Niadtong Marso 1, adunay  napulo ka Koreano ang na-monitor sa NBI-7 nga miabot sa Mactan Cebu International Airport nga gisugat og duha ka mga Korean guides nga naila lang nga sila si Andy ug Kim.

Gitug-an ni NBI-7 Agent Arnel Pura, niadtong buwan sa Pebrero ning tuiga nakadawat sila og report nga adunay sindikato dinhi sa Sugbo nga nagtanyag og Sex Package Tour ug mga Korean tourists maoy mga parokyano.

Ang ‘package’ naglakip sa pares nga babaye ini og abot dinhi sa Sugbo nga maoy  ilang makakuyog sud sa pila ka adlaw nila nga pagbakasyon dinhi.

Nagkanayon si Pura ang mga na-rescue nga mga babaye giingong gihimong escorts ug sexual partners sa nasikop nga mga Korean nationals.

Matud pa adunay Korean -based group nga maoy mangita og turista didto aron ipadala diri nga sugaton usab sa grupo sa usa ka gipanganlan og “Choi” dinhi. Si Choi padayon pang gipangita.

“Naay grupo sa Korea, naa sad grupo sa Cebu, sa Korea sila sad ang in-charge sa advertisement, ticketing, promotion, naa sila’y website nga gi-maintain unfortunately we could not get through with this website kay Korean website man ni sila tapos you have to enroll,” pasabot ni Pura.

Dihang na-rescue ang mga babaye sila mitug-an nga sila gi-recruit sa usa ka Maribeth Bontog bugti sa bayad nga P2 mil kada adlaw.

Human sa pagkaaresto, nakig-alayon na ang NBI sa Consulate Office of Korea  ingon man sa Bureau of Immigration.

Ugmang adlawa ipasaka ang kasong Large Scale Syndicated Human Trafficking batok nilang Bontog, “Choi,” “Andy” ug “Kim.”

Samtang ang pito ka mga dinakpang Koreano kasohan og paglapas sa Republic Act 10364 kon Use of Trafficked Persons diha sa Lapu-Lapu City Prosecutor’s Office.

Ang NBI-7 wa mosalikway sa posibleng presensiya gyud sa sex tourism nga nalambigit ang mga langyaw dinhi.

Suway nga gikuhaan sa ilang habig ang mga dinakpang Koreano apan silang tanan nagdumili sa pagtingog gani nagtabon pa sila sa ilang mga nawong.

Ang mga na-rescue mipauli una sa ilang panimalay apan karong Lunes sila mipasalig nga mobalik sa buhatan sa NBI-7 aron makig-alayon sa otoridad. -  /EIM) (BANAT NEWS)