Mamamahagi ng imbitasyon sa kasal…Groom niratrat ng karibal, utas
MANILA, Philippines - Pinabulagta ang 28-anyos na binatang malapit nang ikasal matapos itong pagbabarilin ng umano’y kanyang karibal habang namamahagi ng imbitasyon sa kaibigan sa Barangay Tetuan, Zamboanga City sa Zambonaga del Sur noong Biyernes.
Idineklarang patay sa Zamboanga Doctors Hospital sanhi ng mga tama ng bala sa katawan ang biktimang si Mark Emmanuel Santos ng Nangka Drive sa nabanggit na barangay.
Base sa ulat ni P/Supt. Rogelio Alabata na nakarating sa Camp Crame, naganap ang pamamaslang sa kahabaan ng Don Alfaro Street dakong alas-11:50 ng tanghali.
Ayon sa imbestigasyon, kababa lamang sa kaniyang sasakyan ang biktima kung saan mamamahagi ng kaniyang imbitasyon sa kasal sa kaibigang si Rogelio Ababon nang biglang lapitan at pagbabarilin ng suspek.
Narekober naman ng mga operatiba ng pulisya sa crime scene ang mga basyo ng bala ng hindi pa natukoy na kalibre ng baril.
Patuloy naman ang imbestigasyon ng mga awtoridad kung saan kabilang sa sinisilip na anggulo ay love triangle dahil may mahigpit umanong karibal ang biktima sa dalagang pakakasalan.
- Latest