Mister todas sa killer trak
TUGUEGARAO CITY, Cagayan, Philippines – Kamatayan ang sinapit ng 30-anyos na mister makaraang salpukin ng truck ang kanyang motorsiklo sa kahabaan ng national highway sa San Vicente-San Agustin Norte, bayan ng Agoo, La Union kamakalawa ng gabi. Kinilala ng pulisya ang biktima na si Rodolfo Boado Soliven ng Barangay Poblacion sa bayan ng Aringay. Lumalabas sa imbestigasyon na nang-agaw ng linya ng kalsada ang delivery truck (UYD 855) matapos na mag-overtake sa sinundang sasakyan nang matumbok nito ang motorsiklo ng biktima. Sa lakas ng impact, tumilapon at nagpagulung-gulong sa kalsada ang biktima at doon din nalagutan ng hininga habang tinakasan ng hindi natukoy na drayber ang dala nitong truck sa gitna ng kalsada. Nabatid na ang killer truck ay nakarehistro sa isang kompanya na nakabase sa bayan ng Cainta, Rizal.
- Latest