4 pulis dinukot ng NPA rebs
MANILA, Philippines - Isinailalim sa full alert status ang puwersa Caraga PNP matapos kidnapin ng mga rebeldeng New People’s Army (NPA) ang apat na pulis sa bayan ng Malimono, Surigao del Norte kahapon.
Sinabi ni PNP Chief P/Director General Ronald “Bato” de la Rosa na gagawin ng PNP ang lahat upang ligtas na mabawi ang apat na pulis na ginawang prisoner’s of war (POWS) ng NPA, isang araw bago ang State of the Nation Address (SONA) ni Pangulong Rodrigo Duterte.
Kabilang sa mga dinukot ay sina SPO3 Santiago Lamanilao ng Surigao City Police Station; PO3 Jayroll Bagayas, PO2 Caleb Sinaca at Rodrigo Angob, non-uniformed personnel na pawang nakatalaga sa Malimono Police Station sa Surigao del Norte.
Base sa ulat ni P/Chief Supt. Rolando Felix, Caraga PNP director, patungo sa piyestahan sa Brgy. Cagtinae, Malimono ang mga biktima nang harangin ng mga armadong rebelde.
Ilang residente ang nakasaksi sa insidente kung saan iginapos ang mga kamay at kinaladkad patungo sa magubat na bulubundukin bahagi sa nasabing bayan.
“We don’t leave our people behind, gagawin natin lahat mabawi sila. Whatever it takes, negotiation, if it will take giyera to get them out,” ani dela Rosa.
“Makipag-usap tayo, kung ayaw pakinggan makipag-giyera tayo. Di-pupuwede ‘yung we are at the mercy of the enemies of the state,” dagdag pa ng PNP Chief.
Nabatid pa na hindi unipormado ang mga pulis bagama’t may mga bitbit na mga armas nang harangin at bihagin ng mga rebelde matapos na magtungo sa nasabing kapistahan sa imbitasyon ng kaibigan.
- Latest