Lending collector utas sa highway robbery
MANILA, Philippines - Nagbuwis ng buhay ang 23-anyos na lending collector matapos itong pagbabarilin ng mga hindi kilalang kalalakihan na tumangay sa malaking halaga ng pera sa madugong highway robbery sa Barangay Malanduage, bayan ng Kabacan, North Cotabato kahapon ng umaga.
Kinilala ni P/Supt. Bernard Tayong, spokesman ng North Cotabato PNP ang biktima na si Jerson Bation, kolektor ng Asa Philippine Foundation na nakabase sa nasabing lalawigan.
Nasapul sa ulo at hindi na umabot ng buhay sa Kidapawan Hospital.
Ayon sa pulisya, nagmomotorsiklo ang biktima kung saan dala ang perang nakolekta nito para sa kanilang lending firm nang harangin at pagbabarilin sa kahabaan ng highway na may anim na kilometro mula sa nasabing bayan.
Sa pahayag ng mga testigo, napuruhan ang biktima at saka hinablot ang bag na dala nito na pinaglalagyan ng perang nakolekta at mga personal na gamit.
- Latest
