3 kalahok sa Ironman sugatan sa road mishap
TUGUEGARAO CITY, Cagayan, Philippines – Tatlong kalahok sa Ironman challenge ang nasugatan sa naganap na magkahiwalay na sakuna sa mga bayan ng Pagudpud at Bangui sa Ilocos Norte noong Sabado ng umaga.?
Kinilala ni P/Chief Insp. Jonathan Papay, tagapagsalita ng Ilocos Norte PNP ang mga isinugod sa pagamutan na sina Nazer Mohammed, 47, Indian national; Anjelian Tenorio Relente, 26, mga residente sa Muntinlupa City; at si Emmanuel Ilagan Balmes, 36 , IT technician at nakatira sa Pasig City.?
Lumalabas sa imbestigasyon na nasagi ang motorsiklo nang lumiko sa kabilang linya ang Chevrolet SUV ni Orlando De Leon sa kahabaan ng highway sa Brgy. San Lorenzo sa bayan ng Bangui.?
Tumilapon at nagpagulung-gulong sa kalsada sina Mohammed at Relente na kapwa naman naisugod sa Governor Roque Ablan Sr. Memorial Hospital sa Laoag City habang sumuko naman si De Leon sa pulisya. ?
Samantala, nabangga at kinaladkad pa ng SUV ni Roderick Panes si Balmes at motorsiklo nito matapos sumadsad sa kurbadang bahagi ng highway sa Brgy. Caunayan sa bayan ng Pagudpud.
Naisugod naman sa Bangui District Hospital ang biktimang si Balmes habang sumuko naman sa pulisya si Panes.
- Latest