Mag-ina sa Cavite, tinodas
Pinasok ng magnanakaw...
MANILA, Philippines — Kapwa natagpuang patay ang isang ina at anak nitong 5-taong-gulang na batang babae sa loob ng kanilang bahay sa Brgy.Navarro, General Trias City, Cavite.
Ang mag-inang biktima ay kinilalang sina Ruby Gamos, 34 at anak nito na si Shaniah Nicole, residente ng Block 7, Lot 14, KS1, Lancaster New City, Brgy. Navarro ng nasabing bayan.
Batay sa ulat, na ilang araw nang hindi nakikita ang hipag ng ginang na si Karen Bongalos dahilan hindi lumalabas ang mag-ina sa kanilang bahay.
Kaya sapilitan nilang ipinabukas ang bahay ng mga ito at dito nadiskubre ang bangkay ng mag-ina sa kanilang kama.
Lumalabas sa autopsy report na ang ginang ay namatay sa pukpok sa ulo habang ang bata ay tinakpan ng unan sa mukha. Nawawala umano ang kotse at mga mamahaling kagamitan tulad ng tablet, TV, cellphone at mga alahas ng mag-ina na ang padre de pamilya na si Marlon Gamos ay isang seaman at nakatakdang umuwi mula sa UAE.
Nabatid na nitong Huwebes pa huling nakausap ni Marlon ang kanyang mag-ina nang padalhan ang mga ito ng selfie photos.
Nagduda ang mga kaanak sa kalagayan ng mag-ina nang hindi makadalo sa school event si Shaniah Nicole noong Biyernes.
Hinala ng pulisya na pagnanakaw ang motibo ng pagpatay sa mag-ina dahil sa nawawala ang kanilang mga mamahaling gamit.
Kahapon ay natagpuan sa tapat ng simenteryo sa Imus ang pulangToyota Wigo ng mga biktima, na may conduction sticker na VD 9843.
- Latest