Nambastos sa Lupang Hinirang, inaresto
MANILA, Philippines — Inaresto ang 20-anyos na si Bavle Einstein Gonzales dahil sa hindi nito pagtayo bilang pagbibigay galang habang pinatutugtog ang pambansang awit na Lupang Hinirang sa isang sinehan sa Angeles City, Pampanga.
Ang suspek ay inireport at ipinaaresto sa mga otoridad ni Charge d’ Affaires Elmer Cato na nagkataong nasa loob din ng sinehan kung saan si Gonzales ay nakaupo sa unahan nito.
Nabatid na bago pa man magsimula ang palabas na pelikula ay pinatatayo ni Cato si Gonzales upang magbigay galang sa pambansang awit.
Gayunman, hindi nakinig si Gonzales na tuloy sa pagkain ng popcorn gayong lahat ay nagbigay galang sa pambansang awit kabilang ang ilang mga dayuhan na nasa loob ng sinehan.
Upang turuan ng leksyon matapos ang palabas sa sinehan ay agad na humingi ng tulong si Cato sa mga pulis at ipinaaresto ang suspek na nahaharap sa kasong paglabag sa Flag and Heraldic Code of the Philippines na may kaparusahan na pagkakulong ng isang taon at may multa na aabot sa P5,000 hanggang P20,000.
- Latest
