Hiling ni Faeldon sa DOJ, ibinasura

MANILA, Philippines — Tuloy ang pagdinig ng kaso na isinampa ng Philippine Drug Enforcement Agency (PDEA) laban kay dating Customs Commissioner Nicanor Faeldon matapos na ibasura ng Department of Justice (DOJ) ang isinampa nitong motion to dismiss kaugnay ng P6.4-billion drug smuggling scandal.

Ibinasura ng DOJ investigating panel na binubuo nina assistant state prosecutors Aristotle Reyes at Rodan Parrocha ang hiling ni Faeldon na ibasura ang reklamo laban sa kanya dahil sa issue ng hurisdiksyon.

Subalit, idineklara ng DOJ na mayroon silang hurisdiksyon na magsagawa ng preliminary investigation sa mga drug offenses na kinasasangkutan ng mga public officials na may salary grade na lagpas 27.

Nakasaad din sa desisyon ng DOJ na ang basehan sa pagbasura nila ng apela ni Faeldon ay ang DOJ resolution sa kaso ni Sen. Leila de Lima na inilabas noong Pebrero 12, 2017 na ang desisyon ay pinagtibay ng Korte Suprema sa illegal drug case nito.

Iginiit ni Faeldon na ang kaso laban sa kanya ay dapat na ihain sa Office of the Ombudsman at hindi sa DOJ dahil siya ay salary grade 30 bilang chief ng Bureau of Customs (BOC).