Construction worker nahulog sa gusali

MANILA, Philippines — Namatay habang nilalapatan ng lunas ang isang obrero matapos mahulog mula sa ikalawang palapag ng ginagawa nilang gusali sa loob ng isang kilalang unibersidad sa Barangay Loyola Heights, Quezon City kamakalawa.

Ang nasawi dahil sa tinamong pinsala sa ulo at katawan ay kinilalang si Danilo Maala, 37, ng Italian Village, Barangay Mabato, San Fernando, Pampanga.

Batay sa ulat, bago naganap ang insidente dakong alas-10:30 ng umaga sa loob ng Ateneo de Manila University Campus sa Barangay Loyola Heights ay nasa ikalawang palapag ng ginagawang International Residence Hall sa Cervini Fields ang biktima.

Inaalis nito ang chain block ng beam nang mawalan ito ng balanse at aksidenteng nahulog sa unang palapag.

Isinugod sa pagamutan ang biktima ngunit binawian din ng buhay.