Bala ng Maute nauubos na
MANILA, Philippines - Inihayag ni Lt. Col. Jo-ar Herrera, Spokesman ng Joint Task Force (JTF) Marawi na matindi ang problema umano ng Maute-ISIS terrorists na bukod sa pagkawala ng kanilang mga lider tulad ng itinalagang Emir ng Isis na si Commander Isnilo Hapilon, problema sa komunikasyon at nauubusan na rin sila ng bala habang palapit nang palapit sa pinagtataguan ng mga ito ang tropa ng pamahalaan sa apat na barangay na kanilang hawak.
“There is the issue of money, the issue of decision making. Some of them, especially those other groups, would like already to get away from the battle zone. Gusto na nilang lumayas, pero yung iba gusto pang mag-stay dun sa position nila”, ani Herrera.
“We are inch by inch, moving towards them yung center sa area. Apektado na yung moral ng Maute-ISIS, mahina na sila”, sabi pa ng opisyal.
Determinado ang tropa ng militar na palayain sa kuko ng terorismo ang Marawi City, subalit ang tanging nagpapabagal lamang sa operasyon ay may hawak pa ang mga itong hostages, maraming mga nakatanim na bomba at iba pang mga eksplosibo sa battle zone.
Idinagdag din ni AFP-Western Mindanao Command Chief Lt. Col. Carlito Galvez na nakatanggap sila ng report na dahilan sa pagkakawatak–watak ng liderato ng Maute-ISIS ay mismong ang ilan sa mga ito ang nagpapatayan dahilan binabaril ang mga tumatakas nilang mga kasamahan.
Magugunita na sumiklab ang krisis sa lungsod noong Mayo 23 matapos na sumalakay ang daang puwersa ng Maute-ISIS na nanunog ng mga gusali, niransak ang mga establisyemento, nang-hostage at pumaslang ng mga inosenteng sibilyan.
- Latest