Leonard bumida sa panalo ng Spurs

LOS ANGELES--Nakontrol lamang ng San Antonio Spurs ang laro sa fourth quarter patungo sa 105-97 paggupo sa Clippers na tinampukan ng 21 points ni star forward Kawhi Leonard.

Ito ang ikatlong sunod na ratsada ng Spurs.

Ang inihulog na 8-2 bomba sa pagsisimula ng fourth period ang nagbigay sa San Antonio ng 85-75 bentahe laban sa Los Angeles patungo sa pagtatala ng kanilang pang-44 panalo sa 57 games.

Nagdagdag sina guard Tony Parker at center Pau Gasol ng tig-17 points, samantalang humakot si LaMarcus Aldridge ng 15 at 11 rebounds para sa Spurs.

Nalasap naman ng Clippers ang kanilang ikalawang sunod na kabiguan at ika-23 sa 58 laro.

Kumolekta si Blake Griffin ng 29 points kasunod ang 23 markers ni Austin Rivers para pangunahan ang Los Angeles.

Sa Oklahoma City, itinala ni Russell Westbrook ang kanyang league-leading na ika-28 triple double ngayong season para igiya ang Thunder sa 110-93 panalo laban sa Los Angeles Lakers.

Tumapos si Westbrook na may 17 points, 18 rebounds at 17 assists bukod pa sa 3 steals para sa ikalawang dikit na panalo ng Oklahoma City.

Nag-ambag sina Alex Abrines at Andre Ro­bert­son ng career-high na tig-19 points, habang kumolekta si center Steven Adams ng 15 points, 10 rebounds, 3 steals at 2 blocks para sa Thunder.

Ipinarada ng Oklahoma City ang mga bagong hugot na sina Taj Gibson at Doug McDermott mula sa Chicago Bulls.

Pinamunuan naman ni D’Angelo Russell ang La­kers sa kanyang 29 points at 6 assists, habang nagdagdag sina Fil-Am Jordan Clarkson at Julius Randle ng 14 at 13 points, ayon sa pagkakasunod.

Sa Chicago, bumangon ang Bulls mula sa 11-point deficit sa fourth quarter para talunin ang Phoenix Suns sa overtime, 128-121  sa likod ng pagbibida ni Dwyane Wade.

Umiskor si Wade ng 23 points kasunod ang 22 markers ni Jimmy Butler para sa pangalawang sunod na tagumpay ng Chicago.