Pulis dedo sa ambush

MANILA, Philippines – Niratrat ng dalawang lalaki na lulan ng motorsiklo ang isang pulis sa naganap na ambush kamakalawa ng hapon sa national highway ng Purok 6, Brgy. Villa Kananga, Butuan City, Agusan del Norte.

Namatay noon din ang biktimang si SPO2 Roldan Ado Damayo, nakatalaga sa intelligence section ng Butuan City Police Office dahil sa mga tama ng bala sa ulo, dibdib, at kaliwang balikat.

Batay sa ulat, bago naganap ang ambush dakong alas-5:30 ng gabi sa kahabaan ng highway ng nasabing lugar ay lulan ng kaniyang motorsiklo ang biktima galing sa pagdalo sa paglilitis ng korte sa kasong may kinalaman sa droga nang mag-overtake ang isang motorsiklo lulan ang dalawang suspek at pinagbabaril.

Pinaniniwalaan namang may kinalaman sa droga sa kasong hawak ng suspek ang motibo ng pagpatay.