Rockets bumawi sa Miami

HOUSTON -- Hindi nasiyahan si Chris Paul sa inilaro ng Rockets ngunit natuwa naman siya sa naging resulta.

Umiskor si James Harden ng 28 points at nakabangon ang Houston mula sa pagkakaiwan para resbakan ang Miami Heat, 99-90.

“You have those games during the season where (you) win the game and move on ... out of 82 of them sometimes it’s going to be ugly, but you just want to win,” sabi ni Paul, nagtala ng 16 points, 6 rebounds at 6 assists.

Umiskor din si Eric Gordon ng 16 markers para sa ikatlong sunod na panalo ng Houston.

Nagbalik sa line-up ng Rockets sina Trevor Ariza at Gerald Green, napatawan ng two-game suspension dahil sa pagsugod sa locker room ng Los Angeles Clippers matapos ang kanilang laro sa Staples Center arena.

Nagtala ang Heat ng double digits bago ang halftime hanggang magtabla ang laro at nagsalpak si Harden ng isang 3-pointer bago tumunog ang kanilang shot clock na nagpainit sa 7-2 atake ng Rockets at kunin ang 95-90 bentahe sa huling 38 segundo ng fourth period.

Naimintis ni James Johnson ang kanyang tres habang nahablot ni center Hassan Whiteside ang offensive rebound para sa Miami.

Sinupalpal ni Harden ang layup ni Whiteside sa posesyon ng Heat kasunod ang dunk ni big man Clint Capela para sa 97-90 kalamangan ng Rockets sa natitirang 18 segundo.

“They did a really good job of trying to run you off the 3-point line,” wika ni Harden. “So that was kind of tough for us tonight, but defensively that second half we locked up, controlled the game and that was it.”

Nanguna sa Miami si Whiteside sa kanyang 22 points at 13 rebounds.

Hindi naglaro si guard Goran Dragic para sa Heat sa ikalawang sunod na pagkakataon dahil sa kanyang bruised left knee.