Triple tie!

PSA Athletes of the Year

MANILA, Philippines — Ang boxing, bowling at billiards ang nagbangon sa Philippine sports noong nakaraang taon.

Nagtala ng mga panalo sina ring champion Jerwin Ancajas, bowler Krizziah Lyn Tabora at cue master Carlo Biado para ipakita ang world-class talent ng mga Filipino athletes.

Dahil dito ay pagsasaluhan nina Ancajas, Tabora at Biado ang pinakamataas na karangalang ibibigay sa pagdaraos ng SMC-PSA (Philippine Sportswriters Association) Annual Awards Night sa Pebrero 27 sa Maynila Hall ng Manila Hotel.

“The PSA is proud to announce Jerwin Ancajas, Krizziah Tabora and Carlo Biado as its Athletes of the Year for 2017. They are truly deserving of the award for the great honor they brought to the country with their respective victories in the world stage,” sabi ni PSA president at SPIN.ph editor Dodo Catacutan.

Ito ang unang pagkakataon na hinirang sina Ancajas, Tabora at Biado bilang Tapa King-Athlete of the Year na ipagkakaloob ng pinakamatandang media organization sa bansa sa annual tradition na inihahandog ng Milo at Cignal TV.

Sapul noong 2015 ay hindi pa nagkakaroon ng multiple awardees ang PSA matapos sina boxers Nonito Donaire Jr. at Donnie Nietes at golfer Miguel Tabuena.

Ang honor list ay kinabibilangan ng President’s Award, Executive Award, National Sports Association (NSA) of the Year, major awardees at iba pa na ibibigay sa formal ceremony na sinusuportahan ng Philippine Sports Commission (PSC) bilang major sponsor kasama ang Mighty Sports, Rain or Shine, Globalport at Phi-lippine Basketball Association (PBA).

Sinimulan ng 25-anyos na si Ancajas ang 2017 sa pamamagitan ng matagumpay na pagdedepensa sa kanyang suot na International Boxing Federation (IBF) junior bantamweight title via seventh-round stoppage (technical decision) kay Mexican Jose Alfredo Rodriguez sa Macau noong Enero.

Matapos ito ay naipagtanggol muli ng tubong Panabo, Davao del Norte na si Ancajas, lumalaban sa ilalim ng Manny Pacquiao Promotions, ang kanyang titulo laban kina Japanese Teiru Kinoshita sa Brisbane, Australia (6th round TKO) at Irishman Jamie Conlan sa Belfast, Ireland (6th round TKO).

Bago matapos ang taon ay pumirma si Ancajas ng two-year, six-deal fight sa Top Rank Promotions ni CEO Bob Arum na ikinunsidera siyang ‘next Pacquiao.’

Inangkin naman ni Tabora ang 53rd QubicaAMF Bowling World Cup sa Hermosillo, Mexico noong Nobyembre na tumapos sa 14-taon pagkauhaw ng bansa.

Tinalo ni Tabora si Siti Safiyah Amirah Abdul Rahman ng Malaysia sa final, 236-191 para maging pang-limang Philippine bowler na nanalo ng World Cup matapos si Paeng Nepomuceno, ang namayapang si Lita dela Rosa at sina Bong Coo at CJ Suarez.

Dalawang linggo bago ang Araw ng Pasko ay tinumbok naman ni Biado ang korona ng World 9-Ball matapos biguin ang kababayang si Roland Garcia, 13-5 sa all-Filipino final sa Doha, Qatar.

Nakasama si Biado, ang gold medal winner sa Southeast Asian Games sa Kuala Lumpur, Malaysia at nagkampeon sa World Games sa Poland, sa hanay nina legendary Efren ‘Bata’ Reyes (1999), Alex Pagulayan (2004), Ronnie Alcano (2006) at great Francisco ‘Django’ Bustamante (2010) bilang Pinoy na nagkampeon sa naturang 9-ball tournament.