Celtics bagsak sa Bulls

CHICAGO – Sinamantala ng Bulls ang hindi paglalaro ni star point guard Kyrie Irving para kunin ang kanilang ikatlong sunod na panalo sa pamamagitan ng 108-85 paglampaso sa Boston Celtics.

Kumamada si Nikola Mirotic ng 24 points habang nagdagdag si Bobby Portis ng 23 markers para tulungan ang Bulls (6-20) na gulatin ang Eastern Conference-leading na Celtics (23-6).

“Bobby and I, we are playing good, we are finding each other and we are bringing that energy that the team needs,” wika ni Mirotic.

Sina Mirotic at Portis ay nagsuntukan sa kanilang practice session noong Oktubre kung saan nagkaroon si Mirotic ng multiple facial fractures at concussion.

Bago ang laro ay inihayag ng Boston na hindi maglalaro si Irving bunga ng thigh injury.

Hindi rin naglaro si forward Marcus Morris dahil sa namamagang kaliwang tuhod para sa Celtics, tinalo ang Detroit Pistons noong Lunes.

Pinangunahan ni center Al Horford ang Boston mula sa kanyang 15 points habang apat pang players ang tumapos sa double figures.

“Sometimes, you get your butt kicked -- it’s as simple as that,” sabi ni Celtics coach Brad Stevens. “Chicago dictated the whole game, they played harder than we did, they played with more presence than we did, they played more competitive than we did, they played with more authority than we did.”

Kinuha ng Boston ang 29-28 abante sa first quarter hanggang maagaw ng Chicago ang 14-point lead, 56-42, sa halftime.