F2 Logistics vs Foton

MANILA, Philippines — Itataya ng league leader  at undefeated F2 Logistics ang kanilang malinis na kartada laban sa reigning champion Foton sa kanilang pagtatapat ngayong gabi sa pagpapatuloy ng aksiyon sa Chooks to Go-Philippine Superliga (PSL) Grand Prix  na dadayo sa  Batangas City Sports Center ngayon.

Magtatapat ang dalawang koponan sa ganap na alas-6 ng Gabi kasunod ng unang  laro sa pagitan ng Petron at Iriga City sa ika-4 ng hapon.

Hindi pa natatalo ang Cargo Movers matapos ang anim na laban at kasalukuyang bumubuntot sa kanila ang Tornadoes at Blaze Spikers na kapwa may 5-1 panalo-talo.

Malaking bagay ang manguna sa elimination round dahil makakatapat nito ang koponang tatapos na No. 8 na magiging huling quarterfinalists sa sudden-death quarterfinals na magsisimula sa Disyembre  5.

Ang mga magwawagi sa  quarters ay uusad sa semifinals kung saan ang mananalo ay magtutuos sa  best-of-three finals.

Aminado si F2 Logistics coach Ramil de Jesus na isang napakalaking balakid ang  two-time champion Foton para sa target nilang maging topseed sa eliminations.

“Playing Foton will be very tough,” pahayag ni  de Jesus. “I’m quite worried because we’re always winning. I’m not saying that we want to lose, but losses will bring out the character of my team. We haven’t experienced that. So if we’re going to lose, I want it to happen early so we will have time to recover and make some adjustments right away.”

Ngunit sa kanilang nilalaro,  tila hindi imposible na magawa nilang mawalis ang eliminations.

“As much as possible, we want to sustain this run. But we won’t be surprised if we lose any time soon,” dagdag pa ni  de Jesus, na sasandigan muli sina imports Kennedy Bryan at Maria Jose Perez sampu ng mga  local stars na sina  Kim Fajardo, Aby Maraño, Kim Dy at Majoy Baron.

Sa panig naman ng Foton, inaasahang hindi rin sila basta magpapatalo.

“This game will be very crucial,” wika ni Foton coach Moro Branislav.

“F2 Logistics has yet to lose. We want to win this game because I believe that they are one of the biggest challenges in our goal of winning the title.”