6-sunod na panalo na ang Warriors

OAKLAND, California – Para sa matagum-pay na pagdedepensa ng Golden State Warriors sa kanilang korona ay kailangang magbigay ng kontribusyon ang lahat.

Nakakuha ng double-digits sa kanilang mga starters, dumiretso ang Warriors sa kanilang ikaanim na sunod na ratsada nang pabagsakin ang Philadelphia 76ers, 135-114.

“It’s been great to have so many guys contribute so many guys contribute in different ways,” sabi ni Draymond Green. “That’s what we’ve talked about early on was our depth and guys have stepped up.”

Nagbalik sa aksyon si Kevin Durant matapos magkaroon ng leg injury para pangunahan ang Golden State mula sa kanyang 29 points.

Humakot naman si Green ng 10 points, 10 rebounds, 7 assists, 5 blocks at 2 steals habang nagdag-dag si Stephen Curry ng 22 points at 9 assists para lampasan ang 4,000-assist mark ng kanyang career.

Umiskor si Klay Thompson ng 23 markers para sa Warriors na tuluyan nang iniwanan ang 76ers sa second half.

Pinamunuan ni JJ Redick ang Philadelphia mula sa kanyang 17 points.

“You realize that there is zero margin of error,” wika ni 76ers coach Brett Brown sa Warriors. “There is so much firepower on that team.”

Sa Dallas, kumolekta si Kevin Love ng 29 points at 15 rebounds at isinalpak ni Kyle Korver ang lahat ng kanyang 13 markers sa final period para tulungan ang Cleveland Cavaliers sa 111-104 panalo laban sa Mavericks.

Kinuha ng Cleveland ang kontrol sa third quarter at nagposte ng 11-point lead sa fourth period hanggang makalapit ang Dallas sa one-point deficit.

Tumalbog ang tangkang triple ni Harrison Barnes sa huling 39 segundo na nagbigay sana sa Mavericks ng one-point advantage.

Umiskor si Barnes ng team-leading na 23 points at 12 rebounds kasunod ang 21 at 14 markers nina Dennis Smith, Jr. at Dirk Nowitzki, ayon sa pagkakasunod.