Pilipinas tatayong host ng 2018 FIBA 3x3 World Cup

MANILA, Philippines - Pormal na tinanggap ng Pilipinas ang hosting duties para sa FIBA 3x3 World Cup sa susunod na taon.

Ibinigay ng host France ang nasabing trabaho kay Samahang Basketbol ng Pilipinas (SBP) executive director Sonny Barrios sa isang maikling seremonya sa Nantes, France na siyang pinagdausan ng 2017 FIBA 3x3 World Cup.

Tumapos ang Pilipinas, binanderahan nina Kiefer Ravena, Kobe Paras, Jeron Teng at PBA forward JR Quiñahan, sa 11th place mula sa kabuuang 20 kopo-nang lumahok sa torneo.

Samantala, inangkin naman ng Serbia ang gold medal sa men’s division matapos gibain ang Netherlands, 21-18, sa championship round.

Kumamada si Dejan Majstorovic ng 11 points, habang nagdagdag si legendary 3x3 player Dusan Bulut ng 8 markers para sa panalo ng Serbia.

Tinapos ng Serbia ang torneo na may 7-0 record.

Nakamit naman ng punung-abalang France ang bronze medal makaraang itakas ang dramatikong 18-17 panalo kontra sa Slovenia.

Nagposte din ng 7-0 marka ang Russian women’s team, pinatumba ang Hungary, 19-12, para angkinin ang gold medal.