Ginebra gustong kumalas

MANILA, Philippines - Kakalas ang Barangay Ginebra sa pagkakatabla sa ikalawang puwesto para palakasin ang kanilang tsansa sa isa sa dalawang ‘twice-to-beat’ incentive habang target ng nagdedepensang Rain or Shine ang tiket sa quarterfinal round.

Lalabanan ng Gin Kings ang Blackwater Elite ngayong alas-7 ng gabi matapos ang pakikipagkita ng Elasto Painters sa Globalport Batang Pier sa alas-4:15 ng hapon sa 2017 PBA Commissioner’s Cup sa Alonte Sports Arena sa Biñan, Laguna.

Sa tournament format, ang sisikwat sa No. 1 at No. 2 berths ay magbubulsa ng ‘twice-to-beat’ bonus sa quarterfinals laban sa No. 8 at No. 7, ayon sa pagkakasunod.

Hangad ng Ginebra ang kanilang ikalawang sunod na panalo matapos talunin ang San Miguel, 107-99 noong nakaraang Linggo para kaagad makabangon sa isang kabiguan.

Nauna nang sumakay ang Gin Kings ni two-time PBA Grand Slam champion coach Tim Cone sa isang five-game winning streak bago napigilan ng Elasto Painters, 118-112 noong nakaraang Biyernes.

Nagmula naman ang Blackwater sa 87-96 pagyukod sa Mahindra sa kanilang huling laro noong Mayo 7.

Sa unang laro, puntirya rin ng Elasto Painters ang kanilang ikalawang dikit na panalo at ang puwesto sa eight-team quarterfinals cast sa pagharap sa Batang Pier.

Sa come-from-behind 118-112 win laban sa Ginebra ay humakot si import Duke Crews, pumalit kay Shawn Taggart ng 28 points at 22 rebounds para sa Rain or Shine na na-kabawi mula sa 16-point deficit. (RCadayona)