19-man team sumabak sa World Poomsae Championships

MANILA, Philippines – Sumabak ang kabuuang 19 atleta ng Pilipinas sa 2016 World Poomsae Taekwondo Championships na sumipa noong Setyembre 22 at matatapos sa Oktubre 2 sa Lima, Peru.

Sina delegation head Igor Mella, foreign coach Ji Ho Chui at international referee Stephen Fernandez ang nangunguna sa koponan na suportado ng PLDT Home Ultera at MVP Sports Foundation.

Ang nasabing torneo ang magsisilbing exposure sa mga national athletes na naghahanda para sa 2017 Southeast Asian Games at sa 2018 Asian Games sa Jakarta.

Makakaharap ng mga Filipino athletes ang mga lahok ng 74 pang bansa kagaya ng Korea, China, France, Spain, Iran, Turkey, Germany, Chinese Taipei at United States.

Sina Jean Pierre Sabido, Ernesto Guzman Jr., Dustin Jacob Mella, Raphael Enrico Mella, Rodolfo Reyes Jr., Jeordan Dominguez, McAvynger Alob, Jerel Anthony Dalida, Mark Lorenz Balcita, June Ninobla, Joel Lacsamana at Glenn Lava ang bumubo sa men’s team.

Ang women’s squad ay kinabibilangan naman nina Rinna Babanto, Juvenile Faye Crisostomo, Joecel Lyn Ninobla, Angelica Joyce Gaw, Janna Dominique Oliva, Elisabeth Cesista at Ailleach Dulce Amor Perez.

Ang poomsae o ang forms ay isang importanteng elemento sa taekwondo.

Sumusunod ang isang competitor sa systematic movement sa magkakasunod na sequences laban sa isang imaginary opponent o multiple opponents.

Ang mga kamay at paa ang ginagamit sa interconnected techniques katulad ng blocking, punching, striking, thrusting at kicking.

Ang madalas na pagsasanay ng poomsae ay nakakatulong sa atleta para sa kanilang flexibility at kontrol sa paghinga, balanse, lakas, eye focus at mental discipline.

Ang iba pang sponsors ng koponan ay ang Smart Communications, Inc., PLDT, Meralco, TV5 at Philippine Sports Commission.