Pamangkin Nabagok ang Ulo

Dear Vanezza,

Dalawang taon noong mabagok ang ulo ng aking pamangkin na wala namang nangyari kaya hindi na pinatingin ng hipag ko. Pero simula pitong taon ay nagkaroon siya ng epilepsy. Ang malungkot ay hiwalay na ang kanyang magulang na parehong may kanya-kanya ng pamilya. Mahal ang gamutan ng pamangkin ko. Hindi tinatanggap sa social worker o PCSO at napakamahal pa ng gamot. Ako ay single at sa akin na lumaki ang bata na hindi puwedeng iwanan; mayroon lamang akong maliit na sari-sari store sa bahay. Ano ba ang gagawin namin magtiyuhin? – Cesar

Dear Cesar,

Hindi mo kailangang akuin ang gastos. Ipaalam mo sa kanyang magulang ang sitwasyon ng bata dahil obligasyon pa rin nila ang kanilang may sakit na anak. Kahit mayroon na silang sariling pamilya. Gagaan ang bigat ng problema kung tulung-tulong sa gastusin at suporta ng iyong pamangkin, upang mabigyan ng tamang medical sa delikado niyang kalagayan.

Sumasainyo,

Vanezza