AC Troopers nakatokhang na sab
CEBU, Philippines - Miirog na gyud ang daog sa AC Troopers atol sa gihimo nilang operasyon ubos sa liderato ni P/Insp. Dondon Coloscos human nila matokhang ang Sante Barley, 48-44 sa Cebu Legends Basketball Association (CELBA) First Conference niadtong Sabado didto sa Canduman Housing gym, Mandaue City.
Ang AC Troopers nagtangkil na karon og 2-4 nga baraha.
Dili hinuon sayon ang misyon sa AC Troopers kay miagi pa kini og hagip-ot nga agianan una nila mataak ang tungason nga kadaugan.
Kini gumikan kay ang AC Troopers mao man ang naggukod sa unang duha ka kuwarter, gani gibiyaan sila og singko puntos sa halftime, 17-22. Apan takulahaw lang nga milusad og makalisang nga opensiba ang AC Troopers ug ilang na-outscored ang Sante Barley, 16-8 aron masakmit ang labaw, 33-30 paingon sa final period.
Responsabli sa nagpungasi nga ataki sa AC Troopers atol sa second half mao si Rex Gonzaga nga mikadlit og nuybe sa iyang 13 puntos ug ingon man si Opong Englis nga mitira og singko puntos, lakip na ang perpektong tulo ka free throws.
Ang Sante Barley gipangulohan mismo sa ilang team manager nga si Freddie Cabiluna, kinsa mipatuasik og 12 puntos. Si Harvey Magale napugngan lang ngadto sa singko puntos sa Sante Barley nga kausa pa lang nidaog sa unom ka duwa.
Sa laing aksiyon, ang team Quiñahan milubong sa MS Motosuit, 48-34 sa pagpangulo ni Rene ‘Rensen’ Seno ug co-manager Genemar Cena nga nagkumboya’g 15 puntos.
Si Wenn Canas miiskor og 15 puntos, apan si Edgar Bercero igo lang nakaiskor og kuwatro puntos hinungdan sa pagkasugamak sa MS Motosuit ni Lou Ornopia.
Human makatabla, 8-all sa first quarter, ang Quiñahan hinay-hinay nga midistansiya hangtod nga miabot kini ngadto sa 42-30 sa tira ni Cena nga maoy labing daku nga labaw nga natala.
Ang Quiñahan ug MS Motosuit pareho na karong nagbitit og 3-3 records ning maong liga nga natukod pinaagi sa paningkamot sa ilang interim president P/Insp. Dondon. Ang mga duwa gipadagan nilang commissioner Albert Ramos ug adviser Rudy Candelada sa abag nilang Willy Medillo ug Lloyd Chavez ingon man nilang Russel Dacalos, Jeper Inahid ug Choy Pilapil.
Puntos matag usa
Unang duwa:
AC TROOPERS (48) – Gonzaga 13, Saldua 8, Englis 5, Cabahug 4, Chavez 4, Bontilao 4, Ferolino 4, Molit 2, Coloscos 2, Suico 2.
SANTE BARLEY (44) – Cabiluna 12, Abapo 8, Lapina 6, Panilag 5, Magale 5, Suico 2, Miñoza 2, Mahilum 2, Jabas 2.
Ikaduhang duwa:
QUIÑAHAN (48) – Seno 8, Cena 7, Madrid 6, Beldera 6, Ocier 6, Ermac 6, Marturillas 4, Alburo 3, Sabalones 2.
MS MOTOSUIT (34) – Canas 5, Bercero 4, Sebandal 3, Tungal 3, Jordan 2, Rama 2, Suson 2, Yatan 2, Ubas 1. (BANAT NEWS)
- Latest