Kapehan sa Tuburan nilambo pag-ayo
CEBU, Philippines - Dul-an sa 1,000 na ka mag-uuma sa Lungsod sa Tuburan ang nakabenepisyo sa mga pagpananum og kape nga gisuportahan sa gobiyerno.
Gibutyag ni Tuburan Mayor Democrito “Aljun” Diamante Jr. nga ang ilang plantasyon sa kape moabot na sa 2,850 ektarya nga nikatap sa 16 ka barangay.
Gipahibawo ni Diamante nga ang "Kape sa Tuburan" mao na ang gamiton sa usa ka sikat nga coffee shop sa Sugbo nga Coffee Dream nga gipanag-iya ni Glenn Soco, ang presidente sa Mandaue Chamber of Commerce and Industry.
"This program aims to alleviate poverty of my town. Our coffee seedlings are regarded as one of the best. So, I hope daghan mo-patronized sa among kape aron pud makatabang ta sa mga pobre," matud ni Diamante. Gani ginganlan ni Soco og “Kape Arcadio” ang kape sa Coffee Dream isip pasidungog sa lumad sa Tuburan nga revolutionary leader nga si Arcadio Maxilom.
“It excites me to be part of something we can truly claim our own, and I'm happy that our first batch using coffee from our beloved province has arrived,” matud ni Soco.
Sumala pa ni Diamante nga niadtong 2012, adunay national Greening Program ang Department of Environment and Natural Resources.
Iya gitanyag ang 500 ka ektarya sa napulo ka barangay sa ilang lungsod apan tanuman og kape aron dili sama sa kahoy nga pamutlon.
Hapit nangamatay ang kape niadtong 2013 apan usa ka higala ni Diamante nitambag nga mangayo og technical assistance sa Nestle Philippines.
Gitabangan si Diamante sa Nestle sa kondisyon nga mopalit siya og 30 mil ka similya sa kape.
Sa maong tuig ang Tuburan napili isip usab nga beneficiary sa Accelerated and Sustainable Anti-Poverty Program (ASAPP) sa gobiyerno nga maoy nakatabang gyud og maayo sa mga magtanum og kape.
Ang Department of Science and Technology ang nitabang kanila sa proseso sa pagputos.
Gihimug-atan sa mayor nga gusto niyang tabangan ang mga mag-uuma tungod kay nagdako usab siya nga mag-uuma. - /GMR) (BANAT NEWS)
- Latest
