Pangahas og panaway
Sa daghan na niya nga mga diskurso ug pakighinabi sa media, giangkon ni Presidente Rodrigo Duterte ang mga pasangil nila ni Edgardo Matobato ug SPO3 Arturo Lascañas sa iyang papel pagtukod sa Davao Death Squad (DDS) ug sa mga pagpamatay sa gidudahang mga durugista ug ubang mga kriminal sa Davao.
Wa lang hinuo’y mga ngalan, ni mga detalye nga lisud ipasabot, sama sa pagbomba sa mosque ug paghurot og ihaw sa inosenteng mga sakop sa pamilya sa suspetsadong kriminal, apan gisublisubli na og pasigarbo ni Duterte ang daghang patay sa iyang determinadong kampanya paglimpiyo sa Davao.
* * *
Mao nga lisud sabton nga ang lunod patay nga mga dumadapig ni Duterte, labihang nakakisi-kisi sa mga gipanulti ni Matobato sa niaging tuig ug sa pagdason ni Lascañas sa tanan niyang pasangil niadtong Lunes.
Nahadlok ko nga bisan pa tingali kun sa kataposan mokumpisal na si Duterte sa mga pasangil, modupa gihapon ang nabutaan niyang mga dumadapig, mopasidungog sa mga berdugo sa DDS, motulisok sa mga biktima ug mohatag og lisensiya ni Duterte sa paghimo bisan unsay iyang mahunahunaan, bisan unsa kabangis.
* * *
Wa sab magmakuli si Duterte sa pagpasabot nga gituyo ang iyang mga panghudlat ug mga panginsulto aron nga kahadlokan siya uban ang panghinaot nga mapugos sa pagtuman sa iyang mga awhag bisan ang labing banggiitan nga mga kriminal.
Mao ni ang hinungdan nga sa wa pa pasakai og mga kasong kriminal, kada adlaw niyang gibalikas ug gibugalbugalan si Senador Leila de Lima. Mao ni nga bisan 14 ka tuig na nga namatay ang magsisibya nga si Jun Pala, padayon niyang gitungo.
* * *
Sa laktod, dili mabasol si Duterte nga nagkuwang og pasidaan sa iyang mga kaatbang: Dili niya sila tugotan nga mokuwestiyon niya, labi na gyud kun mangahas kini sa pagbaraw sa kausaban nga iyang gisaad sa nasud ug sa katawhan.
Mao nga kun simbako may makabasa niini nga wa kasabot sa mensahe ni Duterte, nga nagtuong buhi pa ang demokrasya, nga mangambisyon pagbatok niya ug nagpaabot nga iyang tahuron o ba kaha paminawon ang sukwahi nilang baruganan, duha ra ang kapilian nga ihatag ni Duterte nila:
Wa’y kinutoban nga kahasol ni De Lima; o wa’y kinutobang pahuway ni Pala.
- Latest
