Gusto nang umuwi pagkatapos itanan
Dear Vanezza,
Ako po si Aileen at nag-asawa sa edad na 18. Hindi na ako nakapagtapos ng pag-aaral dahil tinanan ako ng nobyo ko. Dahil walang consent ay hindi rin kami nakasal. Nangupahan kami ng isang maliit na kuwarto pero hindi kami nakakabayad ng upa. Sabi ng mama ko, malaya akong makakabalik kung iiwanan ko ang aking asawa. Ito ang solusyon na naiisip ko. Pero alam kong masasaktan ang asawa ko. Paano ko iba ito sasabihin sa kanya?
Dear Aileen,
Kausapin mo ang iyong asawa. Ipaintindi mo sa kanya na hindi kayo maaaring mabuhay ng puro pag-ibig lang. Mauuwi rin kayo sa away at hiwalayan dahil sa hirap na dinaranas ninyo. Umuwi muna kayo sa inyong mga magulang at magtapos ng pag-aaral para sa inyong kinabukasan. Kung nagmamahalan kayo talaga, isipin ninyo ang magiging kinabukasan ng inyong magiging mga anak. Tiyak na hindi ninyo papayagang madamay sila sa hirap na dinaranas ninyo. Kapag nagtapos na kayo ng pag-aaral at may matatag na trabaho, dun kayo magbalikan.
Sumasaiyo,
Vanezza
- Latest