Dugang selda tukoron sa CPDRC
CEBU, Philippines - Aprubado na sa hunta probinsyal ang P4.5 milyones nga pundo alang sa pagtukod og dugang selda sa Cebu Provincial Detention and Rehabilitation Center.
Igahin ang maong pundo sa paghimo og 19 ka detention cells diin gibana-banang moabot ngadto sa 13 ka priso ang masulod.
Matud ni Bokal Sun Shimura ang nangamahan sa resolusyon, nga moabot unya ngadto sa 600 ka priso ang mabalhin sa himoong selda.
Gawas sa mga selda, apil usab sa budget ang renovation sa clinic sa provincial jail nga gitinguha sa Provincial Health Office nga mahimong primary health care facility alang sa mga priso.
Si Bobby Legaspi ang officer-in-charge sa CPDRC nagkanayon nga ang planong dugang selda tukoron sa quadrangle sa provincial jail. Nasayran nga 1, 500 ang kapasidad sa provincial jail apan moabot na ngadto sa 2, 741 ang priso niini diin 2, 569 mga lalaki ug 172 ang mga babaye. (BANAT NEWS)
- Latest
