Public hearing sa usbaw sa plite karon
CEBU, Philippines - Giawhag sa Land Transportation Franchising and Regulatory Board-7 ang publiko sa pagtambong sa public hearing sa petisyon sa pagpausbaw sa plitehan karong adlawa.
Matud ni LTFRB-7 Director Ahmed Cuizon nga ang public hearing sugdan alas 9:30 sa buntag sa Cebu Normal University.
"I'm urging those who will be most affected by the proposed jeepney fare hike such as students, senior citizens and workers to attend the hearing so they can officially register their stand on the issue. They should stand up for their rights and be counted," matud ni Cuizon.
Ang Cebu Integrated Transport Service Multi-Purpose Cooperative ug ang Basak Lapu-Lapu City Jeepney Operators and Drivers Association Inc.- National Confederation of Transportworkers Union-Visayas nipasaka sa ilang tagsa-tagsa ka petisyon sa buhatan sa LTFRB-7 niadtong Pebrero 10, 2017.
Ang CITRASCO buot nga pasakaan og P1.50 ang minimum fare sa jeepney sulod lang sa alas 7 hangtud alas 9 sa buntag ug alas 5 hangtud alas 7 sa gabii sa tibuok Central Visayas.
Ang BALACJODA-NCTU-Visayas buot nga pasakaan og P1.50 ang minimum fare sa jeepney ug laing P1.50 nga pagsaka sa plitehan sulod sa samang mga oras.
Gibasehan sa petisyon ang padayong pagsaka sa presyo sa lana ug sa nagkagrabeng trapik sa Metro Cebu.
Buot sa mga petitioners nga modako sab ang take home sa ilang mga drayber. (BANAT NEWS)
- Latest
